بۇدان بىلاي شاعىن سۋبەكت وكىلدەرى زاڭگەرلىك قۇجاتتاردى ەشكىمنىڭ كومەگىنسىز, وڭاي تولتىرا الادى. «اتامەكەن» كاسىپكەرلەر پالاتاسى ءتۇرلى قۇجاتتاردىڭ 100 نۇسقاسى بار وزىق قىزمەتتى ەنگىزىپ, بيزنەستىڭ دامۋىنا قولايلى مۇمكىندىكتەر تۋدىردى. بۇرىندارى كاسىبىن ەندى باستاعان جاندار كوپ جاعدايدا كاسىبي زاڭگەرلەردىڭ كومەگىنە جۇگىنىپ, ۋاقىت جاعىنان دا, قاراجات جاعىنان دا شىعىندانىپ جاتاتىن. ونىڭ ۇستىنە زاڭ تالاپتارىنا ساي تولتىرىلماعان كەلىسىم-شارتتار, باسقا دا قۇجاتتار نەش ءتۇرلى قيكىلجىڭدەر مەن داۋ-دامايلارعا ۇرىندىرىپ, ونىڭ اقىرى سوتقا ارىزدانۋعا ماجبۇرلەيتىن فاكتىلەر از كەزدەسپەيتىن. جاڭا ونلاين قىزمەتى قولدان جاسالاتىن كەدەرگىلەردى, بيۋروكراتيزم مەن قاعازباستىلىقتى ازايتىپ, ساتۋ-ساتىپ الۋ, تاۋاردى جەتكىزۋ, ساۋدا ورنىن جالعا الۋ, ەڭبەك كەلىسىم شارتتارىن جانە تاعى باسقا قۇجاتتاردى بىرىزدىلەندىردى.
«ونلاين سەرۆيسكە شاعىن بيزنەسكە قاجەتتى 100-گە جۋىق قۇجاتتىڭ نۇسقاسى ەنگىزىلگەن. كەز-كەلگەن كاسىپكەر بۇل سايتتا تىركەلىپ, دەربەس جۇمىس ىستەيدى. جۇيەنىڭ تاعى ءبىر ەرەكشەلىگى, قولدانۋشى جەكە پاراقشاسىندا قۇجاتتاردى تولىق ساقتاي الادى», دەيدى كاسىپكەرلەر پالاتاسى ديرەكتورىنىڭ ورىنباسارى جەڭىس قازيەۆ.
وبلىستا جاڭا قىزمەتتى العاشقىلاردىڭ قاتارىندا قولدانعانداردىڭ ءبىرى– جەكە كاسىپكەر سەرگەي ساپكو. ول اعاشتان ءتۇرلى بۇيىمدار جانە كادەسىيلار جاساۋمەن اينالىسادى. كەيدە اعاش جونۋ بىلدەگىن جالعا دا بەرىپ جاتادى.
بۇعان دەيىن بىلدەكتى جالعا بەرۋ كەلىسىم-شارتىن جاساۋ ءۇشىن كاسىپكەرلەر پالاتاسىنىڭ ەسىگىن توزدىرىپ كەلسە, ەندى ۇيدەن شىقپاي-اق قاجەتتى قۇجاتتاردى ءوزى تولتىراتىن بولىپتى.
جاڭا جۇيە ەنگىزىلگەلى ەلۋگە جۋىق كاسىپكەر حابارلاسىپ, قولدانۋ جايىندا جان-جاقتى اقپارات الىپتى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
